ખાંડની નિકાસનો લક્ષ્યાંક ચુકાઈ જશે

મુંબઈ, તા. 24 મે 
ખાંડના વર્તમાન પાક વર્ષ (ઓક્ટોબર-સપ્ટેમ્બર)માં 50 લાખ નિકાસ લક્ષ્યાંક સામે અત્યાર સુધીમાં 30 લાખ ટનના સોદા થાય છે અને તેમાંથી 28 લાખ ટન માલ પરદેશ ચડાવાયો છે. મોસમ પૂરી થતાં સુધીમાં બીજા પાંચેક લાખ ટનનાં કામકાજ થવાની શક્યતા છે, તે જોતાં નિકાસ લક્ષ્યાંકમાં ત્રીસેક ટકાનું ગાબડું પડવાની શક્યતા છે, એમ ઓલ ઈન્ડિયા સુગર ટ્રેડર્સ એસોસિયેશનના પ્રમુખ પ્રફુલ વિઠલાણીએ જણાવ્યું હતું.
``ખાંડ મિલોએ અત્યાર સુધીમાં 30 લાખ ટન ખાંડની નિકાસ માટેના સોદા કર્યા હોવાનું બજારનાં સૂત્રો કહે છે. અમે આવા કોઈ આંકડા તૈયાર કર્યા નથી'' એમ ઈન્ડિયન સુગર મિલ્સ એસોસિયેશનના ડિરેક્ટર જનરલ અબિનાશ વર્માએ કહ્યું હતું.
મોસમની શરૂઆતમાં નિકાસ લક્ષ્યાંક નક્કી કરાયો ત્યારે જ તે વધુ પડ્તો ઉંચો હોવાની લાગણી પ્રવર્તતી હતી, કેમ કે આંતરરાષ્ટ્રીય બજારમાં માલ-ભરાવાને લીધે આપણા નિકાસકારોને પોસાણક્ષમ ભાવ મળવા મુશ્કેલ હતા. આ મોસમમાં વિદેશી બજારોમાં ખાંડના ભાવ દબાયેલા જ રહ્યા છે.
વળી ભારતીય મિલો મુખ્યત્યે સફેદ ખાંડ પર ધ્યાન કેન્દ્રિત કરે છે. વિદેશી બજારોને કાચી ખાંડમાં વધારે રસ હોય છે પરંતુ ભારતીય મિલો માગ પિલાતાની મોસમ (ઓક્ટોબર-એપ્રિલ) દરમિયાન જ કાચી ખાંડ બનાવે છે. કાચી ખાંડની અછતને લીધે આ વર્ષે નિકાસ પર પાકી અસર પડી શકે તેમ છે.

© 2019 Saurashtra Trust

Developed & Maintain by Webpioneer