ડાંગરના માર્કેટ યાર્ડઝમાં હડતાળ

અમારા પ્રતિનિધિ તરફથી  
અમદાવાદ, તા. 10 જાન્યુ.
રાઇસ બ્રાન પર સરકારે ભૂતકાળના દોઢ વર્ષની વેટની ઉઘરાણી કાઢતાં રાઇસ બ્રાન એસોસિયેશનના તમામ વેપારીઓ તેના વિરોધ રૂપે આ પ્રશ્નનો હલ ન આવે ત્યાં સુધી અચોક્કસ હડતાળ પાડીને ડાંગરની હરાજીમાંથી હટી જવાનું નક્કી કર્યું છે. શુક્રવારે પાંચમા દિવસે કોઇ કામકાજો ડાંગરના યાર્ડોમાં ન થતાં ખેડૂતો પરેશાન થઇ ગયા છે. જોકે, હડતાળનો ઉકેલ હવે ટૂંક સમયમાં આવે તેવી આશા છે.
રાઇસ મિલ એસોસિયેશનના સૂત્રોએ જણાવ્યું હતું કે ત્રણસોથી સાડા ત્રણસો રાઇસ મિલો ચાલે છે, તેમાં હાલમાં વેપાર સાવ ઠપ છે. મિલદીઠ આશરે રૂા. 50,000નું નુકસાન છે.  વેપારીઓને આશરે રૂા. 1થી 2 કરોડનું નુકસાન થાય છે. અમારે બાવળામાં જ રોજના 300 ટ્રેક્ટરો આવતા હતા. વેપારીઓ અને ખેડૂતો વચ્ચેનો વેપાર અંદાજે રોજનો દશ કરોડનો રહે છે. એ રીતે પાંચ દિવસમાં ઘણું નુક્સાન થયું છે. જોકે, સૌથી વધુ તો સરકારને જીએસટી, વેટ તેમજ નિકાસ ન થાય તેવા કિસ્સામાં હૂંડિયામણનું પણ નુકસાન છે.  એસોસિયેશને જણાવ્યું હતું કે ટૂંક સમયમાં અમારું પ્રતિનિધિમંડળ નાયબ મુખ્ય પ્રધાન નીતિન પટેલને મળનાર છે અને અમારા પ્રશ્નનો ઉકેલ આવશે તેવી આશા છે.
સરકારે રાઇસ બ્રાન (ફુસકી) પર 2006થી વેટ પાંચ ટકા લાદ્યો હતો પરંતુ સરકારે વેટ ભરવા અંગે સ્પષ્ટતા કરી ન હતી અને વેપારીઓએ વેટ ભર્યો ન હતો. સરકારે હવે ભૂતકાળના 1.4.15થી 10.10.2016 સુધીનો દોઢ વર્ષનો પણ વેટ માગતાં રાઇસ મિલ એસોસિયેશનને હડતાળ પાડવાની ફરજ પડી હતી.  હાલમાં રાઇસ બ્રાન ચાલે છે તેવા સાણંદ ઉપરાંત બાવળા, ધોળકા, અમદાવાદ, જેતલપુર, બારેજા, ખંભાત, તારાપુર, લિંબાચી વગેરે માર્કેટ યાર્ડઝમાં પણ ખરીદ-વેચાણ સદંતર બંધ છે. 

© 2020 Saurashtra Trust

Developed & Maintain by Webpioneer