સંકર રૂની માગ ખૂલતાં ભાવમાં ઉછાળો

સંકર રૂની માગ ખૂલતાં ભાવમાં ઉછાળો
અમારા પ્રતિનિધિ તરફથી 
રાજકોટ, તા. 16 અૉક્ટો. 
કોરોનાને લીધે એકાએક આવી પડેલા લોકડાઉનમાં રૂના ભાવ કડાકા સાથે તૂટી ગયા પછી હવે ફરીથી ઉંચકાઇ ગયા છે. ઓક્ટોબર મહિના દરમિયાન રૂા. 3000નો ઉછાળો આવી જતા હવે ગાંસડી રૂા. 39,000માં મળવા લાગી છે, કદાચ રૂા. 40,000ની સપાટી જોવા મળે તેવી શક્યતા પણ બ્રોકરો નકારતા નથી.  
અમદાવાદના બ્રોકર અરુણભાઇ દલાલ કહે છે, રૂના ભાવ વધવાની સંભાવના અમે અગાઉ પણ વ્યક્ત કરી હતી. તેજીનું મોટું કારણ પાઇપલાઇન ખાલી હોવાનું છે. ભારતમાં જ નહીં વિશ્વબજારમાં પણ માગ સામે પુરવઠાની અછત છે. વળી, તેલંગણામાં તાજેતરમાં ભારે પૂર આવવાથી આશરે છ લાખ હેક્ટરમાં કપાસના પાકને નુક્સાન થયાના સમાચાર છે. 
તેજીના બીજા કારણ વિશે તેમણે જણાવ્યું કે, યાર્ન બજારમાં પણ માગને લીધે સારી તેજી આવી છે. યાર્નનો ભાવ રૂા. 64 હતો તે ઘટીને રૂા. 48-50 સુધી લોકડાઉનમાં જઇ આવ્યા પછી અત્યારે રૂા. 70ની આસપાસ પ્રતિ કિલો લેખે બોલાય છે. નિકાસનો પણ ટેકો સારો છે. ધારણા કરતાં વધારે માલ નિકાસમાં જતા તેજી આવી છે. 
અરુણભાઇ કહે છે, પાછલા વર્ષની 48 લાખ ગાંસડી કરતા નિકાસ વધીને 52 લાખ ગાંસડી સુધી પહોંચી જાય તેમ છે. નવી સિઝનમાં પણ સારા કામકાજો રહેવાનો આશાવાદ છે. ડિસેમ્બર સુધીમાં જ 20-25 લાખ ગાંસડીના સોદા પડી જાય તેવું લાગે છે.  
કોરોનાના કેસ ભારતમા  આવ્યા ન હતા ત્યારે રૂનો ભાવ ખાંડીએ રૂા. 38-39 હજારની સપાટીએ હતો. જોકે લોકડાઉનમાં માગ અને વપરાશ સાવ ઘટી જતા ફટાફટ રૂા. 31-32 હજાર થઇ ગયા હતા. જોકે હવે ઉદ્યોગો ફરી શરુ થવાથી રૂા. 39,000ની સપાટી જોવા મળી છે.

© 2020 Saurashtra Trust

Developed & Maintain by Webpioneer